「推機」設計回歸 小米MIX 3正式抵港

kingkong10002

   

            

相信喺中美貿易戰及華為風波嘅陰霾影響下，相信唔少人揀電話都會變得「政治正確」，小米今日喺香港發布嘅新手機「小米MIX 3」話唔定係你嘅心水，因為佢採用咗久違嘅「推機」設計，將前鏡頭等裝置都收埋晒喺磁動力滑蓋底下，而且螢幕佔比達到93.4%。不過最重要係小米MIX 3延續一貫平價風格，大家不妨學立法會議員葉劉淑儀買返部去做聖誕抽獎。
其實小米MIX 3早於10月份已經喺中國發布咗，所以大家可能會覺得熟口熟面，不過佢今日(14/12)先正式喺香港發布。採用咗磁動力滑蓋設計嘅小米MIX 3最大賣點就係個6.39吋嘅Mon，因為一般全螢幕手機都會將前鏡頭等裝置放喺螢幕上方，不過呢部機就將24MP + 2MP嘅前鏡頭及柔光燈放咗喺滑蓋底下，令到螢幕佔比達到93.4%。
另外，今次小米MIX 3後鏡頭採用咗12MP + 12MP嘅雙鏡頭配置，仲加入咗利用多重HDR重疊技術嘅超級夜景功能，用家可以喺無腳架之下影出無手震兼亮度足夠嘅夜景相。而且佢仲支援960fps嘅影片拍攝功能，可以利用AI配樂功能自動為慢動作影片配樂。
今次喺香港發售嘅小米MIX 3為6GB RAM + 128GB容量版本，佢採用咗旗艦級嘅高通Snapdragon 845處理器，售價為港幣$3899，提供經典黑色陶瓷、翡翠色、寶石藍3色選擇，隨機仲附送10W無線充電器，12月17日中午會喺小米官方網站正式發售。